Banner 980x90

Pīcys lītys, kas juozyna par svātdiņ paradzātū "Boņuks 2015" ceremoneju

Publicitātes foto
Publicitātes foto

Jau itymā svātdīnē, 28. februrarī, ostoitū reizi nūtiks Latgalīšu kulturys goda bolvys "Boņuks" ceremoneja, piļsātys inpormacejis portalu teiklam Pilseta24.lv paviestie Latgolys viestnīceibys GORS Mārketinga nūdaļis vadeituoja Edeite Husare.

Latgolys viestnīceibā GORS sasapuļcēs tyvuoki i tuoluoki latgalīšu kulturys interesenti, atbaļsteituoji i dareituoji. Ar sovu kluotyn byušonu ceremoneju pagūdynuos ari Latvejis Republikys Kulturys ministre Dace Melbārde.

* LOBUOKĪ LATGALISKAJĀ KULTURĀ

Latgalīšu kulturys goda bolva "Boņuks" ir vīneiguo bolva, kas izceļ, apkūpoj i gūdynoj spylgtuokūs i nūzeimeiguokūs sasnāgumus latgalīšu kulturā pārnejuo goda laikā. Itūgod tradicionaluos "Boņuka" muola statuetis par padareitū 2015.godā tiks padūtys 19 nominacejuos. Nominantu vydā ir varganiste Iveta Apkalna, literaturzynuotneica Ilga Šuplinska, grupys "Dabasu Durovys", "Unknown Artist", "Galaktika", remiksu meistars Artūrs Slišāns, poetiskuo roka apvīneiba "Kapļi", dzīsminīks Kārlis Kazāks, grupa "Laimas Muzykanti", etnografiskais ansamblis "Vabaļis", folklorys kūpa "Upīte", festivals "Baltica 2015", Latgolys deju svātki "Večerinka Viškūs", lugu autore Danskovīte, Daugovpiļs teatra izruode "Latgaliešu rulete", dokumentaluo kina "Maršruts 6486", Preiļu tierdznīceibys centra "Ūga" saiminīki Ingūna i Aigars Zīmeli i daudzi cyti – kūpā 84 nominanti. Bolva par myuža īguļdejumu latgalīšu kulturys atteisteibā itūgod tiks padūta pravestam, kulturviesturnīkam i sabīdryskajam darbinīkam Albertam Budžem. Ar pylnu nominantu sarokstu var īpasazeit ite: http://www.latgalesgors.lv/lv/bonuks-2015-nominanti

* KASGADEJĪ SASASTIKŠONYS SVĀTKI

"Boņuks" ir ne viņ kasgadejuo apbolvuošonys ceremoneja, nu tī ir ari dažaidu latgaliskajā kulturā īinteresātūs ļaužu sasatikšonys svātki, kod reizi godā sasateik dareituoji i vāruotuoji, kritiki i aktivisti. Ceremoneju ar sovu kluotyn byušonu pagūdynuos Latvejis Republikys ministre Dace Melbārde, Latvejis Nacionaluo kulturys centra vadeituoja Signe Pujāte, latgalīšu muziki Arnis Slobožanins, Artūrs Uškāns, Guntis Rasims, Normunds Zušs, varganiste Iveta Apkalna, žurejis lūcekli – režisors Viesturs Kairišs, tradicionaluos kulturys eksperte Ruta Cibule, pārnejuo goda "Goda cylvāks" Aleksandrs Lubāns, muokslinīks Osvalds Zvejsalnieks, dzīsminīks Kārlis Kazāks i daudzi cyti. Ceremoniju vadeis muzikis i akters Kristaps Rasims, bet muzykali tū kuplynuos postfolklorys grupa "Rikši". Taipat pyrma i piec ceremonejis varēs īpasazeit i ari nūpierkt latgalīšu literaturys i muzykys izdavumus, latgaliskus suvenirus. Prīškstota dabuošonai par ceremoneju var apsavērt pārnejuo goda "Boņuks 2014" eisū kūpsavylkuma video ite: https://youtu.be/igYvFqRxtPk

* ATSAVIERŠONA IZ RAIŅA GODU I FESTIVALU "ORGANismi"

Ceremonejis pyrmajā daļā byus vareiba natīši atsavērt iz Raiņa i Aspazejis zeimē aizvadeituo goda, jo eipaši "Boņuks 2015" ceremonejai Lelajā zalā tiks izruodeits vargaņu muzykys festivalā "ORGANismi" taiseitais uzvadums "Saule. Bērni. Rainis", kurs radeits varganistis Ivetys Apkalnys, Jāņa Ivanova Rēzeknis muzykys vydsškolys, Rēzeknis muziķu i rodūšūs pruotu sadarbeibys rezultatā kai vargaņu i bārnu saspēle. Uzvadums pyrmū i vīneigū reizi da ituo izskaniejs Latgolys viestnīceibys GORS Mozajā zalā, i tymā muzykā īveits izskanēs ari vīneigais Raiņa latgaliski raksteitais dzejūļs"Muna jaunu dīnu zeme".

* VAREIBA NŪSAVĒRT TĪŠRAIDĒ

Itūgod Latgalīšu kulturys goda bolvu "Boņuks 2015" varēs viertīs ari mobiluo satura lītuotnis "LMT Straume" tīšraidē http://straume.lmt.lv/lv/kultura/kultura/bonuks/1844. Tīšraidis skateituojim tiks pīduovuota īspieja īsavērt ceremoneis sagataveišonys aizkulisēs, storpbreidī redzēt i dzierdēt intervejis ar ceremonejis nominantim, gostim i žurejis lūceklim, nūsavērt latgalīšu muzykys video i īsavuiceit ari koč kū pasceit latgaliski. Ceremonejis suokums 16.00, storpbreids suoksīs 17.00, bet ūtruos, bolvu padūšonys dalis, suokums paradzāts 17.30.

* EIPAŠS BRAUCĪŅS IZ LATGOLU

Saleidzynojūt ar daudzom cytom bolvom, iz "Boņuks" ceremoneju, pyrma tuo nūpārkūt beletu, var tikt kotrys interesents. Kab tuolums da Latgolys nabyutu atruna, itūgod bolvys organizātuoji pīduovoj īspieu grybātuojim nu Reigys iz Rēzekni braukt ar eipašu "Boņuka" reisu, kurs puļcēs kai nominantus, tai bolvu padeviejus i vīnkuorši latgalīšu kulturys interesentus. Izbraukšona nu Reigys iz Rēzeknis paradzāta 11.00 nu reita, vītys autobusā vēļ ir īspieja dasaceit, zvonūt Latgolys viestnīceibai GORS 22020206 (vītu skaits gon īrubežuots). Autobuss piec ceremonejis brauks ari atpakaļ iz Reigu.

Latgalīšu kulturys goda bolvys "Boņuks 2015" nūtikšonu atbolsta Vaļsts kulturkapitala fonds, Rēzeknis piļsātys dūme,  Rēzeknis nūvoda, Daugovpiļs nūvoda, Bolvu, Kuorsovys, Cyblys, Dagdys, Ludzys, Leivuona, Viļakys, Ruguoju i Baļtinovys nūvodu pošvaļdeibys, Nacionalais Kinu centrys i biedrība "Latvijas Izpildītāju un producentu apvienība".

Dalies ar šo rakstu

Uz sarakstu
Pilseta24.lv neatbild pievienotajiem lasītāju komentāriem, kā arī aicina portāla lasītājus, rakstot komentārus, ievērot morāles un pieklājības normas, nekurināt un neaicināt uz rasu naidu, iztikt bez rupjībām. Lūguma neievērošanas gadījumā Pilseta24.lv patur tiesības liegt komentēšanas iespēju. Komentāros publicējamā teksta garums ir ierobežots līdz 1000 zīmēm. Nereģistrētiem lietotājiem ir aizliegta HTML un hipersaišu publicēšana!
Komentāri (0)